Taur: Ha’u Orgullozu Loos Lidera Nasaun Ida Ne’ebé Nia Sidadaun Sira Sivizmu Tebes

Dili, 22 Maiu 2020 – Primeiru-Ministru (PM) Taur Matan Ruak sente haksolok tebes ho povu sira-nia komportamentu relasiona ho situasaun polítika sira ne’ebé akontese iha loron hirak liubá.

“Ha’u aproveita kongratula populasaun tomak. Ha’u kontente loos haree joven sira-nia komportamentu, inan-aman sira-nia komportamentu iha relasaun ho situasaun sira hanesan ne’e, no hakarak hateten katak ha’u orgullozu loos halo pare ezekutivu ida ne’e, lidera país ida ne’ebé nia sidadaun esklaresidu tebes, sivízmu tebes, ha’u orgullozu loos no parabéns ba povu Timór”, dehan Taur.

Taur Matan Ruak mos husu atu hotu-hotu nafatin kontinua ho komportamentu di’ak ne’e, hodi ida-idak bele hala’o knaar tanba buat ne’ebé aat nunka halibur ita.

“Kontinua nafatin hanesan ne’e, ida-idak halo nia serbisu hanoin katak buat ne’ebé aat nunka halibur ita, ida ne’ebé di’ak sempre halibur ita, hametin ita-nia nasaun, hametin ita-nia unidade ne’e importante tebes”, hatutan Taur.

PM hato’o lia hirak ne’e hafoin  hala'o enkontru ho Prezidente Repúblika iha Palásiu Prezidensiál, iha 21 Maiu 2020.

Fonte: Mídia Gabinete do Primeiro Ministro (GPM)

Notísia Hotu-Hotu >