Asidente Tránzitu Nia Hún Mak Motorista Sira Ladún Domina Regra No Falta Formasaun

Dili, 06 Agostu 2020 - Komandante Jerál Polísia Nasionál Timor-Leste (PNTL), Komisáriu Faustino da Costa, hateten katak deteta ona abut hosi númeru asidente tránzitu iha teritóriu nasionál tanba falta formasaun adekuada ba motorista sira.

Faustino da Costa informa ida ne'e hafoin remata audénsia ho Prezidente Repúblika Francisco Guterres Lú Olo, ohin, iha palásiu Prezidensiál Nicolau Lobato, Dili.

Faustino hatutan, presiza iha formasaun adekuada molok atribui karta kondusaun. Atu buka solusaun hamenus asidente, la'os PNTL mesak nia responsabilidade maibé envolve entidade relevante sira seluk.

Tuir Komisáriu Faustino, fatór ida ne'ebé kontribui ba númeru asidente tránzitu aumenta mak lei tanba autoriza sidadaun ida ho tinan 14 ba leten bele lori motorizada no iha karta kondusaun. Tanba ne'e, tenke halo revizaun ba lei hodi atualiza tuir nesesidade ohin loron nian.

Fonte: Mídia Presidente da República (PR)

Notísia Hotu-Hotu >