CNJTL Konvida Espoza PR Atu Servisu Hamutuk Hodi Promove Desportu Femenina

Dili, 24 Setembru 2020 – Prezidente Konsellu Nasionál Juventude Timor-Leste (sigla portugés CNJTL) Dadi Magno hamutuk ho Koordenadór Juventude hosi Munisipiu 7, iha kuarta ne’e (23/9), hasoru malu ho Espoza Prezidente Repúblika (PR) Cidália Nobre Guterres, iha salaun Casa Militar Palásiu Prezidensiál, hodi konvida Espoza PR atu servisu hamutuk hodi promove desportu femenina iha Timor-Leste liuhosi Taxa Rotativa Primeira Dama ba Futsál Femenina.

Programa ida ne’e mai ho objetivu atu komemora loron Nasionál Juventude no Masakre Santa-Krúz 12 Novembru. Objetivu seluk tán mak halo promosaun ba partisipasaun feto iha dezenvolvimentu setór futsál no lori futsál ba integra iha komunidade nu’udar desportu komunitáriu hodi atinje alta prestasaun, no ikus liu atu hametin no promove amizade entre joven feto sira hosi munisipiu 7 liuhosi jogu futsál femenina.

Espoza PR hato’o apresiasaun ba inisiativa hosi joven sira hodi realiza no halo promosaun ba desportu femenina ne’ebé mak sei sai dalan alternativa ba joven feto sira atu kanaliza sira-nia espresaun desportiva.

Fonte: Mídia Gabinete Conjuge do PR

Notísia Hotu-Hotu >