SEKOMS Sei Moderniza Rádiu Komunidade Atu Uza Streaming Hodi Divulga Informasaun

Dili, 25 Setembru 2020 – Sekretáriu Estadu ba Komunikasaun Sosiál (SEKOMS) iha polítika atu moderniza rádiu komunidade sira iha teritóriu Timor-Leste hodi transmite informasaun liuhosi plataforma streaming.

Líder SEKOMS Merício Juvinal dos Reis ‘Akara’, hateten iha tinan ida ne’e, rádiu komunidade sanulu-resin-neen sei utiliza streaming hodi divulga informasaun, iha ne’ebé ninia preparasaun atinji ona pursentu 70.

Ba daudauk ne’e, SEKOMS liuhosi Diresaun Nasionál Sentru Rádiu Komunidade hahú fó formasaun ba profisionál sira iha rádiu komunidade kona-ba oinsá adapta plataforma dijitál ka mídia online tanba durante ne’e sira uza mídia konvensionál hodi halo publikasaun ba informasaun sira.

SEKOMS kompromete sei kontinua fó apoiu finanseiru ba rádiu komunidade sira hodi asegura funsionamentu servisu.

Líder SEKOMS ne’e apela ba jestór rádiu komunidade sira atu kontinua tuir formasaun sira hodi aumenta kapasidade nune’e bele sai jestór ne’ebé di’ak atu hala’o knaar ho transparente.

Fonte: Mídia Secretário de Estado Para a Comunicação Social (SECOMS)

Notísia Hotu-Hotu >