MOP Prepara Hela Kondisaun Ba Peregrinasaun Na'in-Feto Ramelau Iha Outubru

Dili, 25 Setembru 2020 - Ministru Obras Públikas (MOP), Salvador dos Reis Pires, fó ona orientasaun ba diresaun sira inklui Institutu Jestaun Ekipamentus (IJE) atu prepara kondisaun hodi fasilita atividade peregrinasaun hosi sarani Katólika ne’ebé sei hala’o iha 6 no 7 Outubru ba vizita Na’in-Feto iha foho Ramelau, ne’ebé sei partisipa mós hosi Bispu sira.

“Loos duni, hori bainhira ha’u simu vizita kortezia hosi Sr. Ministru ho Vise Ministra Turizmu, Komérsiu no Industria (MTKI) ko’alia kona-ba asuntu ne’e no sira haruka karta mai ha’u, ha’u haruka despaxu ona ho klasifikasaun importante tebes ba ha’u-nia diresaun sira para atu fó atendimentu, maibé ita-boot sira hatene katak hanesan estrada sira ne’e obra ne’ebé presiza planeamentu no mós ezekusaun ne’ebé presiza tempu, saida mak ami bele halo mak ami bele mobiliza ekipamentu IJE para halo atendimentu ba iha pedidu ne’e rasik, para iha tempu badak bele fasilita netik kondisaun ne’ebé mínimu para eventu ne’e bele la’o ho di’ak”, Ministru Obras Públikas informa ba jornalista sira iha Palásiu Governu, hafoin reuniaun Konsellu Ministru iha kuarta ne'e (23/9), relasiona ho kondisaun estrada ne’ebé ladún di’ak ba Foto Ramelau.

Daudauk ne’e ekipa tékniku husi diresaun sira hahú halo ona koordenasaun ho ekipa sira hosi MTKI oinsá mak bele kria kondisaun ba atividade peregrinasaun ba vizita Na'in-Feto iha Foho Ramelau.

Fonte: Mídia Ministério das Obras Pública (MOP)

Notísia Hotu-Hotu >