Kareta Estadu Nian Ida Eiz Funsionáriu MEJD Uza Tiha Nu’udar Sasán Privadu

Dili, 25 Setembru 2020 - Ekipa Fiskalizasaun Konjunta (EFK) obrigatoriamente dada kareta Estadu hosi eiz funsionáriu kontratadu Lindo da Silva iha Ministeriu Edukasaun Juventude no Desportu (MEJD) ne’ebé durante tinan barak uza hodi hala’o servisu Estadu nian maibé la entrega ba Diresaun Lojistika MEJD nian. Asaun ne’e EFK halo, ohin (25/9) iha suku Bekora, Dili.

EFK ne’ebé halo asaun represivu ne’e kompostu hosi Komisaun Anti Korupsaun (sigla portugés CAC), Polisia Nasionál Timor-Leste (PNTL), Komisaun Funsaun Públika (sigla portugés CFP), Diresaun Nasionál Transporte no Terestre (DNTT), Patrimóniu Estadu no ofisiál ME rasik.

Kareta tipu Pajero Mini ho plat 20-414 ne’e patrimoniu doasaun hosi Banku Mundiál ba Ministériu Edukasaun iha 2003-2005 liubá, ne’ebé funsionáriu kontratadu sira uza ba hala’o servisu Estadu nian. 

Patrimoniu hirak ne’e rejistadu ona iha Diresaun Patrimóniu Estadu Ministériu Finansa no oras ne’e EFK kontinua hala’o servisu rekollamentu ba patrimóniu Estadu hirak ne’e iha utilizadór sira-nia liman.

Maske eiz funsionáriu MEJD oras ne’e servisu ona iha fatin seluk maibé kontinua utiliza kareta doasaun Banku Mundiál nian ho xapa matríkula privadu.

“EFK identifika hotu ona patrimóniu Estadu no sei kontinua rekolla hotu inklui funsionáriu ho kargu xefia sira ne’ebé mandatu hotu ona maibé sei utiliza kareta no motorizada Estadu nian mós sei foti hotu”, Katak Euclides Madeira, Pontu Fokál CAC ba EFK.

Fonte: Mídia Comissão Anti Corrupção (CAC)

Notísia Hotu-Hotu >