Konsellu Superiór PNTL Propoin Ba Governu Atu Demite Membru PNTL Na’in-3

Dili, 25 Setembru 2020 – Konsellu Superiór Polísia Nasionál Timor-Leste (PNTL) halo reuniaun hodi fó opiniaun kona-ba proposta atu halo demisaun ba membru PNTL na’in-5 ne’ebé komete iregularidade iha nia knaar loro-loron nu’udar Autoridade Seguransa, atu hato’o ba Ministru Interiór hodi foti desizaun ba membru PNTL hirak ne’e.

Sekretária Konsellu Superiór Superintendente Xefe Carlos Jerónimo hateten, enkontru ne’e hodi haree kona-ba kazu prosesu disiplinár liuliu ba kazu 5. Entre kazu 5 ne’e, iha kazu 3 mak Komandante sira fó opiniaun atu halo demisaun, enkuantu kazu 2 seluk sei haree fila-fali.

Nune’e, nia haktuir tán, proposta demisaun 3 relasiona ho kazu 3 ne’e, sei hato’o ba Ministru Interiór hodi deside, tanba Konsellu Superiór bele fó opiniaun de’it maibé desizaun tomak kona-ba demisaun Ministériu Interiór mak sei foti.

Membru PNTL ne’ebé mak komete kazu no sei hetan demisaun ne’e ho nível Postu Sarjentu no Ajente.

Fonte: Mídia Polícia Nacional de Timor-Leste (PNTL)

Notísia Hotu-Hotu >