Aviaun Militár Nian Ida Monu Iha Ukránia No Hamate Ema 22

Asidente, 26 Setembru 2020 – Aviaun militár nian ida ne’ebé transporta estudante hosi eskola ida kona-ba Aviasaun nian, monu iha Ukránia Nordeste, iha sexta (25/9) kalan, no hamate ema 22, tuir informasaun ne’ebé Autoridade sira hato’o.

Xefe Estadu-Maiór Forsa Armada Ukránia, Ruslan Khomchak informa katak aléin hosi na’in-22 ne’ebé mate, iha mós ema na’in-2 seluk hetan kanek todan.

Totál ema iha aviaun ne’e nia laran hamutuk 27, tuir informasaun hosi Servisu Emerjénsia Estatál Ukránia nian.

Ema hirak iha aviaun laran ne’e maioria Universidade Forsa Aérea Kharkiv nia estudante, ne’ebé administra hosi Ministériu Defeza Ukránia.

Asidente ne’e nia kauza iha hela investigasaun nia laran, maibé pilotu ida relata katak falla hosi aviaun nia motór ida.

Fonte: BBC News

Notísia Hotu-Hotu >