Igreja Waimori Hanaran Ba Santu Úniku Ida Ne’ebé Hatene Lian Tétun

Vikeke, 27 Setembru 2020 – Bispu Dioseze Baukau Dom Basilio Do Nascimento, iha Domingu ne’e (27/9), selebra misa no prezide serimónia lansamentu fatuk dahuluk ba konstrusaun Igreja Katólika Waimori, iha munisípiu Vikeke. Igreja Waimori ne’ebé tama ona iha prosesu konstrusaun ne’e hanaran Saun Calisto Caravário.

Calisto Caravário nu’udar Santu ida ne’ebé hala’o nia misaun Salezianu durante tinan 2 iha Timor-Leste, iha tempu kolónia portugés nian, no nu’udar Santu úniku ne’ebé hatene lian Tétun, haktuir publikasaun hosi pájina ofisiál facebook Ministériu Turizmu Komérsiu no Indústria nian.

Wikipedia mós temi katak Saun Caslito Caravário hala’o nia misaun iha Timor-Leste hahú hosi 1927 to’o 1929, no hetan tiru hodi hakotu-iis nu’udar mártir ida, iha 25 Fevereiru 1930, iha Xina.

Selebrasaun misa no serimónia lansamentu fatuk dahuluk ba Igreja Waimori ne’e hetan mós partisipasaun hosi Ministru Turizmu, Komérsiu no Indústria José Lucas do Carmo da Silva.

Fonte: Ministério do Turismo, Comércio e Indústria (MTCI)

Notísia Hotu-Hotu >