Tribunál Prepara Planu Atu Implementa Lei Medida Prevensaun No Kombate Korupsaun

Dili, 28 Setembru 2020 - Prezidente Tribunál Rekursu Deolindo dos Santos, ohin, aprezenta planu Tribunál nian ba Prezidente Repúblika, Francisco Guterres Lú Olo, iha palásiu prezidensiál, kona-ba wainhira Lei Medida Prevensaun no Kombate Korupsaun tama iha vigór ka implementa.

“Ami iha planu atu iha formasaun ida ba juiz sira hotu iha inísiu Fevereiru, molok tama iha vigór lei ne’e. Para juiz sira iha perspetiva ne’ebé hanesan. Koñesimentu ne’ebé di’ak molok hola desizaun ruma komesa tama iha vigór lei ne’e. Planu seluk mak pasa informasaun ba juiz sira, ofisiál justisa, dirijente apoiu Tribunál no auditóriu Kamára Konta nian para iha informasaun natoon kona-ba lei ne’e. Tanba lei ne’e prevé norma balu operadór iha Tribunál sira tenke deklara sira-nia rikusoin, ” Prezidente Tribunal Rekursu informa.

Prezidente Repúblika iha promulgasaun ba Lei Medidas Prevensaun no Kombate Korrupsaun, 24 Agostu 2020 liubá hateten, importante tebes prevensaun no kombate korupsaun atu insituisaun funsiona efetivamente, tuir prinsípiu legalidade, izensaun, transparénsia, efisiénsia, efikásia, simplisidade no previzibilidade ba prosedimentu.

Fonte: Mídia Presidente da República (PR)

Notísia Hotu-Hotu >