Graduadu Nia Susesu Mak Família Nia Susesu Tanba Família Mak Sakrifika Apoiu Tomak

Dili, 28 Setembru 2020 – Ministru Ensinu Superiór, Siénsia no Kultura (MESSK), Longuinhos dos Santos, hateten katak Graduadu sira-nia susesu sai mós nu’udar susesu ida ba sira-nia família, tanba família halo ona sakrifísiu hodi fó apoiu ba sira atu hakat liu susar tomak iha sira-nia prosesu estudu.

Longuinhos dos Santos hato’o ida ne’e, iha serimónia graduasaun Universidade Nasionál Timor Lorosa’e nian ba períodu dahuluk 2020, ohin, iha CCD merkadu-lama, Dili.

“Estudante sira-nia susesu sai mós susesu ida ba sira-nia família, tanba família sira-ne’e fó tiha apoiu tomak hodi nune’e sira manán susar oioin durante sira-nia perkursu akadémiku. Tanba ne’e, ba estudante hirak-ne’ebé ohin tuir serimónia ida ne’e, ha’u hakarak fó parabéns no haruka tuir ha’u-nia haku’ak ida ba sira-nia família tomak iha uma, tanba família sira ne’e mak halo sakrifísiu no sai responsável ba sira-nia susesu”, Longuinhos hateten.

MESSK lori mós VIII Governu nia naran, hato’o kongratulasaun ba Graduadu UNTL nian períodu dahuluk 2020, ne’ebé mai hosi kursu oioin.

Fonte: Mídia Ministério Ensino Superior Ciência e Cultura (MESCC)

Notísia Hotu-Hotu >