UNTL Hala’o Serimónia Graduasaun Da-XXIII Ba Graduadu Na’in-568

Dili, 28 Setembru 2020 - Universidade Nasionál Timor Lorosa’e (UNTL) realiza serimónia graduasaun ba da-XXIII, iha iha Sentru Konvensaun Dili (sigla portugés CCD), ohin, hodi integra hikas graduadu na’in-568 ba komunidade hodi serví.

Iha sesaun solene dadeer nian, graduasaun ba Fakuldade Agrikultura na’in-116, Fakuldade Enjeñaria, Siénsia no Teknolojia na’in-61, Siénsia Ezata na’in-4, Medisina no Siénsia Saúde na’in-35, Ekonomia no Jestaun na’in-26 no Direitu na’in-17.

“Ba graduadu sira, imi konsege pasa ona iha aspetu akadémiku, lojístiku, maibé ikus mai esforsu tomak ne’ebé imi hala’o, ohin loron imi bele gradua no hetan susesu, basá UNTL fó de’it mak kail atu imi bele kail ikan barak liután, hanesan ho siénsia ne’ebé imi hetan buka dezenvolve no kontribui ba sosiedade no nasaun”, Reitór UNTL Francisco Miguel Martins hateten, iha nia intervensaun.

Reitór mós salienta katak, estudante wainhira termina ona vida universitáriu, fila-fali ona ba vida komunitáriu ho matenek ne’ebé iha, tantu iha teoria, iha prátika, no prontu dedika tuir área espesialidade ida-idak nian.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >