OMS La Rekomenda Ona Atu Implementa Lockdown Tanba Halo Ema Kiak Sai Kiak Liu Tán

Dili, 12 Outubru 2020 – Organizasaun Mundiál ba Saúde (OMS) atualmente alerta ba líder iha nasaun hotu-hotu atu labele depende ba lockdown hodi kombate pandemia Covid-19. Maibé, molok ne’e OMS informa ba nasaun hotu-hotu atu kuidadu wainhira laiha restrisaun, haktuir mídia Detik News.

Tuir reportajen hosi Nypost, iha segunda ne’e (12/10) Reprezentante Espesiál OMS David Nabarro hateten katak, medida restritiva hanesan lockdown ne’e bele implementa de’it nu’udar últimu rekursu.

“Ami iha Organizasaun Mundiál ba Saúde (OMS) la rekomenda lockdown nu’udar maneira dahuluk hodi kontrola vírus ne’e”, informa Nabarro, wainhira hetan entrevista hosi Jornál Británika, The Spectator.

“Buat ne’ebé ami fiar katak bele hadi’a liuhosi lockdown mak atu fó tempu ba ita hodi redefine, reorganiza, reekilibra rekursu, proteje médiku sira ne’ebé kole. Maibé jeralmente, ami prefere liu atu labele halo ida ne’e (lockdown)”, Nabarro dehan.

Nabarro hatutan, iha konsekénsia signifikativu hosi lockdown liuliu ba ekonomia globál.

“Lockdown nia konsekénsia ida ne’ebé ita labele subestima ne’e mak halo ema kiak sai kiak liu tán”, Nabarro hatutan.

Nia akresenta tán katak lockdown fó impaktu forte ba nasaun sira ne’ebé depende maka’as ba setór turizmu.

Fonte: Detik News

Notísia Hotu-Hotu >