SEA Sei Rekruta Juventude 300 Ba Programa Brigada Voluntáriu Defeza Ambiente

Dili, 13 Outubru 2020 – Sekretáriu Estadu ba Juventude no Desportu (SEJD) Abrão Saldanha halo enkontru ho Sekretáriu Estadu Ambiente (SEA) Demetrio de Carvalho, iha segunda (12/10) ne’e, iha sala reuniaun SEJD, hodi diskute kona-ba posibilidade atu servisu hamutuk hodi haree liu ba oinsá mak joven sira bele partisipa ativu iha protesaun meiu ambiente.

Nune’e, membru Governu na’in rua ne’e ko’alia liu kona-ba programa Juventude Brigada Voluntáriu Defeza Ambiente. Iha faze dahuluk, sei rekruta uluk juventude volutáriu na’in-300 ne’ebé sei simu formasaun durante loron rua hosi SEA. Voluntáriu sira ne’e nia númeru sei hasa’e ba 1000 no SEJD kompromete atu kontribui liuhosi mobiliza joven sira ba programa ida ne’e. Tuir ajenda, lansamentu ba programa refere sei hala’o iha 27 Outubru 2020.

Abrão Saldanha informa mós ba SEA katak SEJD iha sentru juventude iha munisipiu sira hotu no nia haree katak serbisu sira ne’ebé relasiona ho meiu ambiente bele hala’o ho sentru juventude sira ne’e tanba sira loro-loron halo servisu ho joven no organiza joven sira iha baze.

Fonte: Mídia Secretário Estado Juventude e Desporto (SEJD)

Notísia Hotu-Hotu >