Norovirus Infekta Estudante 70 Resin Hosi Universidade Ida Iha Xina

Xina, 13 Outubru 2020 – Estudante 70 resin hosi Universidade Shanxi, Taiyuan, iha Xina, infektadu hosi norovirus. Sira iha sintoma hanesan diareia no muta hahú hosi Kuarta (7/10) liubá, haktuir mídia CNN Indonézia.

Tuir informasaun hosi Xinhua, Departamentu Kontrolu no Prevensaun Moras iha Taiyuan foti amostra hosi kazu 28 hosi estudante sira hodi ba halo teste moras norovirus iha Kuarta no Sábadu liubá. Hafoin halo tiha teste, iha kazu 11 mak relatadu katak pozitivu infektadu tán hosi norovirus.

Norovirus la halo parte ba virus corona ne’ebé oras ne'e sai nu'udar pandemia mundiál. Virus corona transmitidu hosi ema ba ema liuhosi fluidu, enkuantu norovirus espalla hosi ema ne’ebé infektadu nia fo’er (portugés Fezes).

Ema ne’ebé sofre norovirus sempre hatudu sintoma hanesan laran-sa’e, muta, kabun moras no diareia iha oras 24 nia laran hafoin hán.

Tuir informasaun hosi Sentru Kontrolu no Prenvensaun Moras iha Xina katak, iha surtu norovirus 30 resin mak relatadu ona iha teritóriu nasionál Xina dezde Setembru tinan ida ne’e, ho kazu hamutuk 1.500 ona.

Fonte: CNN Indonesia

Notísia Hotu-Hotu >