PDHJ Fó Treinamentu Ba Membru PNTL Ainaru Kona-ba ‘Knaar Polísia No Protesaun Direitu Umanu’

Dili, 14 Outubru 2020 – Provedoria ba Direitu Umanu no Justisa (sigla portugés PDHJ), ho Unidade Asesoria Direitu Umanu (UADU) no Sentru Formasaun Polísia (sigla portugés CFP), realiza atividade treinamentu ba membru Polisia Nasionál Timor-Leste (PNTL) Munisipiu Ainaru kona-ba ‘Knaar Polisia no Protesaun Direitu Umanu’, iha salaun enkontru PNTL Munisipiu Ainaru, durante loron 5 hahú hosi 12 to’o 16 Outubru 2020.

Provedora ba Direitu Umanu no Justisa, Jesuina Ferreira Gomes, iha abertura hateten katak, formasaun ida ne’e bazeia ba akordu kooperasaun entre PDHJ ho CFP iha 2014 no renova fali kooperasaun ne’e iha 2019 ne’ebé asina hosi Komandante Jerál PNTL ho Provedora rasik iha salaun Biblioteka PDHJ, hodi kontinua fó formasaun ba membru PNTL sira iha teritóriu Timor-Leste.

Formasaun refere ho nia objetivu atu eleva ka hasa’e koñesimentu membru PNTL sira nian kona-ba respeitu no protesaun direitu umanu.

Provedora hatutan tán, durante tinan hirak nia laran hahú hosi 2015 to’o 2019, membru PNTL ne’ebé partisipa iha treinamentu ne’e hamutuk 386 ne’ebé kompostu hosi feto 55 no mane 331. Haree hosi númeru hirak ne’e hatudu katak, partisipante feto ba iha formasaun ne’e minimu tebe-tebes.

Ba tinan ida ne’e, PDHJ ho nia parseiru sira fó formasaun ba PNTL iha Munisipiu 3 hanesan Ainaru, Aileu no Liquisá.

Fonte: Mídia Provedoria dos Direitos Humanos e Justiça (PDHJ)

Notísia Hotu-Hotu >