MOP Halo Sosializasaun Kona-ba Prosesu Tenderizasaun Ba Emprezáriu Lokál Sira

Dili, 15 Outubru 2020 - Ministru Obras Públikas (MOP), Salvador dos Reis Pires, hamutuk ho Diretór Jerál Administrasaun Finansa, Januário Barbosa, no Diretór Nasionál Aprovizionamentu (DNA), Quintiliano Belo, halo sosializasaun kona-ba prosesu tenderizasaun ba emprezáriu lokál sira iha edifísiu MOP, Mandarin, Dili.

Salvador Pires informa, polítika VIII Governu nian kona-ba implementasaun projetu sira iha área infraestrutura nian katak projetu hotu ne’ebé implementa tenke liuhosi prosesu aprovizionamentu, tanba wainhira Governu halo pagamentu ba projetu ida tenke ho baze legál mak kontratu, kompañia sira labele implementa projetu ida sein kontratu.

Salvador Pires esplika tán, kompañia sira labele promove projetu mesak, maibé Governu mak tenke promove no dezenvolve hosi inísiu estudu viabilidade, prosesu tenderizasaun ba kompañia sira to’o hetan manán na’in hodi asina kontratu.

Atividade sosializasaun ne’e partisipa hosi Prezidente Kámara Komérsiu Indústria Timor-Leste (sigla Portugés CCI-TL) munisípiu Dili nian, inklui emprezáriu lokál sira iha munisípiu Dili.

Fonte: Mídia Ministério das Obras Pública (MOP)

Notísia Hotu-Hotu >