Feto Rurál Sira Nu’udar Erói Ba Ai-hán

Dili, 15 Outubru 2020 – Iha selebrasaun loron mundiál feto rurál ne’ebé realiza iha kinta (15/10) ne’e, Ministru Agrikultura no Peska Pedro dos Reis, hato’o parabéns ba feto rurál sira hodi hateten katak liuhosi atividade agríkola ne’ebé sira halo hanesan kuda ai-hán no hakiak animál, feto rurál sira sai nu’udar autór ka erói ba ai-hán.

“Hanesan Ministru Agrikultura no Peska, ha’u hakarak uza biban ida ne'e hodi fó parabéns ba feto rurál sira ne'ebé kuda ai-hán no hakiak animál, sira hotu nu’udar autór ba ai-hán ka erói ba ai-hán. Ha’u hakarak fó parabéns ba feto rurál sira hotu nia loron, maske ita selebra iha kapitál, ha’u fiar selebra mós iha área rurál. Maibé ha’u espera katak loron ida ne'e fó motivasaun ba feto rurál sira atu kontinua buras ba nafatin hodi hateke ba oin”, Pedro dos Reis hato’o ida ne’e, wainhira partisipa iha selebrasaun loron feto rurál, ne’ebé hala’o iha salaun City 8 Manleuana, Dili.

Pedro salienta katak halo to’os no natar la’os mane de’it maibé ho mós feto nia kontribuisaun. Iha tempu uluk feto sai nu’udar ema daruak, maibé ohin loron feto hanesan parseiru mane nian ba dezenvolvimentu iha aspetu hotu-hotu.

Fonte: Mídia Ministério da Agricultura e Pescas (MAP)

Notísia Hotu-Hotu >