SEA Sei Sosa Bote Rihun Resin Hosi Komunidade Sira Hodi Kombate Saku Plástiku Iha Timor-Leste

Dili, 19 Outubru 2020 – Sekretáriu Estadu Ambiente (SEA) Demetrio de Carvalho informa katak Governu liuhosi SEA sei sosa Bote rihun ba rihun hosi komunidade sira ne’ebé mak homan, atu sai hanesan alternativu ida hodi troka saku plástiku iha programa sesta bázika ne’ebé Governu atu fahe ba uma-kain vulnerável sira.

"SEA sei sosa Bote hosi komunidade rihun ba rihun, tan ne’e husu ba inan ho alin feto sira ne’ebé iha suku rua Ailiku no Leo-lima ne’ebé mak hatene homan Bote ka alternativa seluk karik bele inan sira, tia sira, ho alin feto sira bele homan bote to rihun 5 ka liu ida ne’e di’ak liu tán, ha’u sei haruka ekipa Ambiente mai rekolla no sosa iha ne’e", SEA informa ida ne’e ba komunidade sira, iha sexta (16/10) liubá, iha suku Ailiku, munisípiu Ainaru.

SEA hatutan katak Bote ne’ebé atu sosa hosi komunidade ne’e sei uza hodi tau sasán apoiu sesta bázika nian no entrega fila-fali ba povu hanesan jestu ida hodi promove produtu komunidade sira nian no mós dalan ida atu kombate saku plástiku iha Timor leste.

Fonte: Mídia Sekretariu Estadu Ambiente (SEA)

Notísia Hotu-Hotu >