Veteranu Balu Mak Envolve Rasik Iha Kazu Falsifikasaun Dokumentu Veteranu Falsu

Dili, 19 Outubru 2020 – Prezidente Repúblika Francisco Guterres Lú Olo informa katak nia preokupa ho veteranu nia envolvimentu iha falsifikasaun dokumentu veteranu falsu, liuhosi dalan ilegál atu simu osan, hodi hetan rekoñesimentu hosi Estadu, ne’ebé tuir loloos veteranu tenke sai nu’udar ezemplár ba sidadaun sira seluk tanba kontribuisaun iha luta ba libertasaun nasionál.

Prezidente Repúblika hato’o ida ne’e, ohin, wainhira hasoru malu ho Prokuradór Jerál Repúblika José da Costa Ximenes, iha palásiu prezidensiál Nicolau Lobato, Dili.

Hafoin audiénsia ho Prezidente Repúblika, Prokuradór Jerál Repúblika informa katak, veteranu balu ne’ebé mak envolve iha kazu falsifikasaun dokumentu ne’e agora hetan ona pena iha prizaun.

Iha 16 Outubru liubá, Tribunál Distritál Díli fó pena ba autór sira no obriga atu selu fila-fali indiminizasaun ho valór osan $93.547.  Prokuradór Jerál Repúblika husu ba Ministériu relevante atu foti medida rigorozu ba autór ne’ebé envolve iha kazu falsifikasaun dokumentu ne’e.

Prokuradór Jerál ne’e haktuir tán, envolvimentu veteranu sira nian la’os de’it kona-ba falsifikasaun dokumentu, maibé mós ba projetu infraestrutura sira ne’ebé hetan hosi estadu.

Fonte: Mídia Presidente da República (PR)

Notísia Hotu-Hotu >