Abrão Hakarak Hahú Governasaun Dijitalizadu Iha SEJD Durante Nia Mandatu

Dili, 23 Outubru 2020 – Sekretáriu Estadu ba Juventude no Desportu (SEJD) Abrão Saldanha hateten katak oras ne’e ema barak mak utiliza ona teknolojia foun iha servisu fatin, tanba ne’e, nia iha mehi atu hahú governasaun dijitalizadu iha SEJD durante nia mandatu.

"Ohin loron ema barak mak uza ona teknolojia foun iha servisu fatin. Dadus barak mak persiza arkiva no dadus sira ne’e tenke tuir sistema dijitalizasaun. Ha'u-nia mehi ida mak governasaun dijitalizadu bele hahú iha SEJD durante ha'u-nia mandatu ida ne'e," Sekretariu Estadu informa, iha kinta (22/10) ne’e, wainhira halo abertura ba formasaun kona-ba dijitalizasaun arkivu ba funsionáriu SEJD sira, iha sala reuniaun SEJD Lesidere, Dili.

Abrão Saldanha salienta, dijitalizasaun no protesaun ba arkivu ne’e importante tebes atu preserva SEJD nia memória institusionál, tanba ne'e funsionáriu sira tenke partisipa ho di’ak iha formasaun ne’e atu bele aplika kedas iha sira-nia servisu fatin.

Diretora Diresaun Nasionál Informasaun, Komunikasaun no Teknolojia (DNICT), Aida de Jesus Soares informa, SEJD iha arkivu rasik maibé uza sistema manuál de’it. Tanba ne’e, nia hateten, “ha'u agradese Sua Exelénsia Sekretáriu Estadu ba polítika ne'ebé ita bele hahú tau iha prátika ohin liuhosi formasaun ida ne'e tanba importante tebes duni atu asegura SEJD iha sistema ne'ebé di’ak ba prezerva memória institusionál”.

Fonte: Mídia Secretário Estado Juventude e Desporto (SEJD)

Notísia Hotu-Hotu >