Primeiru-Ministru Orienta SEKOOP Atu Harii Kooperativa Produsaun Mínimu Rua Iha Kada Suku

Baukau, 23 Outubru 2020 – Sekretáriu Estadu Kooperativa (SEKOOP) Elizário Ferreira, informa katak Primeiru-Ministru Taur Matan Ruak fó orientasaun ba SEKOOP atu harii kooperativa produsaun mínimu liu mak rua iha kada suku, no máximu depende ba poténsia ne’ebé eziste iha suku ne’e.

Elizário hato’o informasaun ida ne’e, ohin (23/10), wainhira halo intervensaun iha semináriu kona-ba kooperativa ho tema ‘Dezenvolvimentu Ekonomia Lokál Baze Iha Kooperativa’, ne’ebé realiza iha postu-administrativu Baguia, munisípiu Baukau.

"Formasaun no semináriu sira ne'ebé mak halo, kumpri misaun Sua Exelénsia Primeiru-Ministru, Taur Matan Ruak nian, ne'ebé orienta ami-ata katak, sé bele mínimu liu iha kada postu-administrativu kooperativa kréditu union ida, no iha kada suku mínimu kooperativa produsaun rua, máximu depende ba potensiál suku ne'ebé mak iha”, Elizário informa.

Iha tempu hanesan, Prezidente Kooperativa Buras Baguia, Agostinho Guterres rekomenda ba Governu liuhosi SEKOOP katak formasaun no semináriu labele para iha ne’e de’it, maibé tenke kontinua ba oin.

Fonte: Mídia Secretário do Estado Cooperação (SECoop)

Notísia Hotu-Hotu >