Francisco Branco: Kombate Korupsaun Presija Integridade Tanba Laiha Ema Ida Mak Santu

Dili, 23 Outubru 2020 – Prezidente Ezekutivu Global Organization of Parliamentarians Against Corruption (GOPAC) Timor-Leste, Francisco Miranda Branco, hateten katak Laiha ema ida mak santu, tanba ne’e atu hadook-an hosi korupsaun, presiza integridade forte hosi ema ida-idak atu labele halo korupsaun wainhira hetan oportunidade, tanba korupsaun nu’udar vírus ida ne’ebé bele estraga nasaun.

Francisco Branco hato’o ida ne’e ba jornalista sira, ohin (23/10), hafoin remata semináriu kona-ba Kombate Korupsaun, iha salaun João Saldanha University, Dili.

“GOPAC preokupadu ho situasaun korupsaun nian tanba korupsaun ne’e ba ami ne’e hanesan virus ida, virus, moras aat. Uluk ami servisu hamutuk ho Sekretariadu HIV/SIDA ami haree korupsaun ne’e hanesan moras ne’ebé bele estraga ita-nia nasaun. Ne’e mak ami hanoin ita hotu-hotu tenke hadook-an hosi ne’ebá, laiha ema ida santu iha ne’ebá, laiha santu. Oportunidade, kuandu hetan oportunidade sé laiha integridade bele monu ba korupsaun. Entaun ita tenke hasai anti body ida ne’e, anti body mak integridade. Sé integridade forte bele luta kontra korupsaun. Sé integridade la forte, hetan oportunidade korupsaun mosu”, hateten Francisco Branco.

Tanba ne’e, Branco husu Polítiku sira hamutuk ho sidadaun hotu-hotu, fó liman ba malu hodi luta kontra korupsaun.

Fonte: Timor News

Notísia Hotu-Hotu >