SEKOMS: Ita Laiha Direitu Atu Taka Mídia Sosiál Sira Tanba Ne'e Tenke Uza Ho Matenek

Dili, 23 Outubru 2020 - Sekretáriu Estadu ba Komunikasaun Sosiál (SEKOMS) Merício dos Reis Akara hateten katak, Timor-Leste laiha tempu no laiha direitu atu taka mídia sosiál sira tanba la'os iha ne'e, ne'e duni sidadaun sira tenke uza oportunidade era dijitál ne'e ho kuidadu no ho matenek tanba era foun ne'e iha mós komplexidade.

SEKOMS hato'o ida ne'e, wainhira halo intervensaun iha atividade kampaña kona-ba kombate HOAX no promove internet saudável, ne'ebé realiza ohin (23/10), hodi marsa hosi rotunda monumentu Prezidente Nicolau Lobatu, Komoro, to'o iha Golgota Mall.

"Ita laiha tempu atu taka mídia sosiál sira, dalaruma ita mós laiha direitu atu taka facebook tanba facebook la'os iha ne'e, iha fatin seluk. Ita laiha mós direitu atu taka instagram, whatsapp tanba la'os iha ne'e, iha fatin seluk ne'ebé mundu ninian (...) Ne'e duni, era foun ida ne'e hanesan ohin ha'u dehan, iha oportunidade maibé iha nia komplexidade rasik sé ita la kuidadu, sé ita la matenek hodi uza", Akara informa.

SEKOMS mós esplika katak Estadu no Governu iha responsabilidade hodi prepara sidadaun sira atu aproveita era dijitál ida ne'e ho matenek tanba era foun ne'e sei hamosu sivilizasaun foun, moris foun, hahalok foun no kultura foun.

Fonte: Timor News

Notísia Hotu-Hotu >