UNTL Sei Simu Estudante Foun 4.320 Ba Tinan Akadémiku 2021

Dili, 24 Outubru 2020 - Universidade Nasionál Timor Lorosa'e (UNTL), liuhosi Pro-reitoria ba Asuntu Akadémiku nia Diretór Jerál ba Servisu Administrasaun Akadémiku, Armindo Leto Fátima, iha kinta (22/10) ne'e, iha kampuz UNTL, informa katak ensinu superiór públika UNTL sei simu estudante ho totál 4.320 ba tinan akadémiku 2021.

“Bazeia ba Diploma Ministériu Nú. 33/2020, nune’e, MESSK estabele ona Ekipa KAES (Komisaun Asesu Ensinu Superiór) ne’ebé konstitui hosi MESSK, UNTL, IPB, MEJD no instituisaun seluk tán mak responsável ba prosesu ne’e, no dahuluk mak diseminasaun no agora daudauk ita tama ona iha faze daruak mak rejistrasaun”, hatutan Armindo Leto.

Armindo esplika mós katak pasu tuir mak sei hala’o ezame ba kandidatu sira iha 23 Novembru, no ba rejime jerál, finalista sira sei hili ho opsaun I, II, no III kursu ne’ebé sira prefere, hafoin ezame finál ne’ebé sei sentraliza iha MEJD.

Diretór Jerál ne’e mós salienta tán katak totál estudante foun ne’ebé previstu ona 4.320, no hosi númeru ne’e sei distribui ba kada departamentu ne’ebé eziste iha fakuldade sira UNTL nian.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >