Krize Ekonómika Tanba Covid-19, Komunidade Iha Mianmar Konsumu Laho No Réptil

Dili, 27 Outubru – Komunidade kbiit-laek sira iha  Hlaing Thar Yar, área kiak ida iha sidade Yangon, Mianmar, obrigatoriamente konsumu laho no samea hodi sobrevive tanba sira hasoru krize ekonómika grave ne’ebé kauza hosi pandemia Covid-19.

Ma Suu nu’udar sidadaun ida hosi área refere, haktuir katak sira tenke konsumu samea no laho hodi aguenta iha situasaun ne’e. Animál sira ne’e kaer hosi dadalak ka bee-dalan ne’ebé besik sira-nia hela-fatin.

“Komunidade sira hán laho no samea. Sein rendimentu, sira tenke hán hanesan ne’e hodi bele alimenta hikas sira-nia oan”, Ma Suu dehan, tuir informasaun ne’ebé AsiaOne divulga (25/10).

Ma Suu konta katak nia halo ona meiu barak hodi bele sosa hahán. Iha virus corona nia onda dahuluk iha Marsu liubá obriga nia tenke taka tiha nia kioske. Maibé to’o agora la loke tanba onda virus corona mosu nafatin.

Situasaun ida ne’e komunidade seluk mós hasoru. Tanba ne’e, sira depende ba laho, réptil no insetu sira hodi konsumu.

Mianmar nu’udar nasaun ida iha Sudeste Aziátiku ne’ebé ho kazu Covid-19 aas tebes, no lockdown iha Yangon kauza ona ema rihun resin mak lakon servisu.

Fonte: Detik News

Notísia Hotu-Hotu >