MAPKOMS Diskute Kooperasaun Servisu Ho Konsellu Imprensa

Dili, 27 Outubru 2020 – Ministru ba Asuntu Parlamentár no Komunikasaun Sosiál (MAPKOMS) Francisco Jerónimo ho komitiva hala’o vizita kortezia ba Konsellu Imprensa, iha segunda (26/10) ne’e, iha Kintal-boot, Dili.

Vizita ne’e ho intensaun atu haree diretamente kondisaun edifísiu Konsellu Imprensa nian no ko’alia mós kona-ba kooperasaun servisu entre MAPKOMS ho órgaun reguladór komunikasaun sosiál ne’e iha futuru.

Prezidente Konsellu Imprensa Virgílio Guterres informa ba MAPKOMS katak Konsellu Imprensa sei kontinua buka meiu atu koopera ho ministériu relevante sira liuliu ho MAPKOMS hodi implementa atividade kona-ba literásia mediátika ho literásia dijitál.

Virgilio hatutan, ba oin sei diskute mós kona-ba nesesidade revizaun ba kuadru legál sira liuliu Lei Komunikasaun Sosiál no Estatutu Konsellu Imprensa tanba Konsellu Imprensa identifika katak iha Lei Komunikasaun Sosiál la mensiona ho loloos plataforma mídia online.

Hafoin rona esplikasaun sira, MAPKOMS responde katak nia sente kontente ho programa hirak ne’ebé órgaun reguladór ne’e elabora no enkoraja atu kontinua fó atensaun ba programa ne’ebé implementa tiha ona. Ezekutivu ne’e mós kompromete sei tau konsiderasaun no diskute preokupasaun sira ne’ebé Konsellu Imprensa hato’o ona.

Fonte: Ministério dos Assuntos Parlamentares e Comunicação Social (MAPCOMS)

Notísia Hotu-Hotu >