PNTL La Autoriza Sarani Sira Lori Tua Ba Hemu Iha Rate Iha Loron Finadu

Dili, 27 Outubru 2020 – Segundu Komandante Polísia Nasionál Timor-Leste (PNTL) munisípiu Dili, Superintendente Euclides Belo, hateten katak komunidade sira labele lori tua ka bebida alkólika sira hodi ba hemu iha semitériu. Membru PNTL sei halo aprensaun ba bebida alkólika sira wainhira hetan sarani ruma lori.

“Ami fó ona avizu ba ita-nia komunidade sira katak ba iha semitériu ba kari ai-funan ne’e lori ai-funan no lilin ba rate, la’os lori tua-sabu, tua-mutin, bintang no sagres ba rate lae. Komandante PNTL munisípiu Dili sei koloka nia pesoál sira iha resintu semitériu sira ne’e para depois kuandu sé mak ba semitériu hemu tua, ami sei halo aprensaun, tua ami prende hotu.  Duké tua ne’ebé ita-boot sira lori ami prende hotu di’ak liu tua rai hela iha uma, ba kari ai-funan hotu, sunu lilin hotu fila ba uma depois mak hemu tua, hán hemu iha uma ne’e di’ak maibé proibidu ba konsumu bebida alkólika sira ne’e iha semitériu laran tanba semitériu laran ne’e la’os bar”, Euclides hato’o ida ne’e, ohin, iha nia knaar fatin, Kaikoli, Dili.

La’os tua de’it, maibé PNTL mós bandu ema hotu atu lori sasán kro’at inklui lema arte-marsiál sira ba iha rate, nune’e, PNTL sei halo pasa revista molok tama ba rate laran.

Fonte: Timor News

Notísia Hotu-Hotu >