Prezidente Repúblika Fiar Katak Igreja Protestante Iha Timor-Leste Sei Sai Forte Liu Tán

Dili, 27 Outubru 2020 – Prezidente Repúblika Francisco Guterres Lú Olo hato’o nia mensajen ba Igreja Protestante iha Timor-Leste (IPTL) ne’ebé realiza Asembleia Jerál ba dala-8 iha Aileu, hodi hateten, nia fiar katak liuhosi Asembleia Jerál ba dala-8 ne’e, IPTL sei sai forte liu tán nu’udar instituisaun espirituál ida iha Timor-Leste ne’ebé hametin ho nia hakarak rasik maibé kontribui mós ba dezenvolvimentu Timor-Leste.

“Igreja Protestante Timor-Leste (IPTL), ohin loron ho fiar-na’in rihun-sanulu-resin-rua iha Timor-Leste tomak, halibur ohin. Ha’u fiar katak iha Asembleia Jerál ba dala-8 ne’e, iha Aileu, IPTL sei sai forte liu tán, nu’udar instituisaun espirituál ida iha Timor-Leste, ne’ebé hametin ho ninia hakarak rasik maibé kontribui mós ba dezenvolvimentu Timor-Leste. Ha’u hatene katak hanesan instituisaun sira seluk, IPTL mós ajuda kuda no hametin valór no prinsípiu ne’ebé kontribui atu hametin domin, solidariedade, páz iha ita-nia sosiedade”, Prezidente Repúblika hato’o mensajen ne’e ba IPTL.

Prezidente Repúblika konta nafatin ho apoiu hosi IPTL, nu’udar instituisaun ida ne’ebé sei kontribui nafatin ba área edukasaun, saúde no agrikultura atu tulun hasa’e kapasidade iha rekursu umanu no hasa’e kbiit atu halakon kiak iha Timor-Leste.

Fonte: Mídia Presidente da República (PR)

Notísia Hotu-Hotu >