Igreja Ida Iha Fransa Hetan Atake, Prezidente Fransa Dehan Terorista Islámiku Mak Halo

Fransa, 30 Outubru 2020 – Ema ida halo atake ho tudik ba igreja katólika ida iha sidade Nice, Fransa, rezulta ema na’in-3 mak mate no balu kanek. Hosi na’in-3 ne’ebé mate, ida mak hetan ko’a iha kakorok no 2 hetan sona.

Sidade refere nia autoridade lokál ida ho naran Christian Estrosi konsidera insidente ne’e nu’udar terorizmu. Nia informa liuhosi nia konta ofisiál twitter katak atake ne’e akontese iha igreja Notre Dame iha kinta (29/10), no polísia kaptura ona suspeitu.

Prezidente Fransa Emmanuel Macron temi katak atake ba igreja katólika ne’e nu’udar asaun loukura terorista islámiku nian.

“Loukura terorista islámiku nian. Dala ida tán, dadeer ne’e, ami-nia sidadaun na’in-3 sai vítima iha Nice no klaru tebes katak Fransa hetan hela atake”, dehan Macron.

Ministru Negósiu Estranjeiru Arábia Saudita hateten katak ida ne’e nu’udar asaun terorizmu ida maibé labele liga fali ba relijiaun tanba relijiaun la hanorin hahalok hanesan ne’e.

Molok ne’e, iha uluk kazu ida ne’ebé akontese, ema lori tudik ko’a profesór ida naran Samuel Paty nia kakorok iha 17 Outubru 2020 liubá, tanba profesór ne’e ilustra fali dezeñu animadu (cartoon) kona-ba profeta Muhammad wainhira nia hanorin matéria sidadania ba estudante sira, nune’e estudante islamizmu  balu la aseita profesór nia asaun ne’e. Populasaun sira halo demonstrasaun maka’as tanba la aseita ho Samuel Paty nia mate.

Fonte: Detik News

Notísia Hotu-Hotu >