MAP Entrega Manu No Bibi Lokál Ba Grupu Hakiak Na’in Sira Iha Ermera

Dili, 16 Novembru 2020 – Ministru Agrikultura no Peska (MAP) Pedro dos Reis, hala’o lansamentu entrega bibi no manu lokál, iha sábadu (14/11) ne’e, ba grupu hakiak na’in sira iha aldeia 4 hanesan, Leirema, St. Krúz, Tata no Betupu, iha suku Ailelo, postu-administrativu Hatulia, munisípiu Ermera.

Ermera sai mós nu’udar alvu ba implementasaun projetu HAPAS, fatin implementasaun iha postu-administrativu 2 mak Hatulia no Atsabe, ho totál suku alvu hamutuk neen no totál aldeia alvu hamutuk 22.

Hosi totál aldeia alvu hamutuk 22 ne’e iha grupu alvu 36, kada grupu hetan manu lokál hamutuk 150, no kada ema ida hetan manu lokál lima, kompostu hosi inan haat no aman ida.

Ba grupu bibi lokál, ema ida iha direitu hetan bibi lokál rua, inan ida no aman ida, no kada grupu ema hamutuk tolunulu.

Pedro dos Reis iha nia intervensaun hateten, nafatin dezafia hakiak na’in sira hotu oinsá tenke servisu maka’as ho animál hirak ne'ebé mak grupu sira simu hodi haree no kuida ho didi’ak.

Fonte: Mídia Ministério da Agricultura e Pescas (MAP)

Notísia Hotu-Hotu >