Lezada Ho Inisiál ODM Simu Kanek Iha Parte Ulun Tanba Lakohi Kontinua Relasaun Domin Ho Suspeitu LBB

Dili, 17 Novembru 2020 – Iha loron 16 fulan Novembru tinan ida ne’e, iha oras 09:50, iha aldeia Moris Foun, suku Kumoro, munisípiu Dili, mosu insidente ida ne’ebé kauza hosi problema domin, ne’ebé ikus mai rezulta lezada ida ho inisiál ODM hetan kanek iha parte ulun.

Porta-vóz Komandu Polísia Nasionál Timor-Leste (PNTL) Superintendente Xefe Arnaldo de Araújo hato’o informasaun ida ne’e, ohin (17/11), liuhosi konferénsia imprensa ne’ebé realiza iha Kuartél Jerál.

Arnaldo salienta, suspeitu ho inisiál LBB hakanek ODM nia ulun tanba lakohi kontinua relasaun namora ho LBB.

“Motivu hosi aktu ne’e tanba de’it lezada lakohi kontinua namora ho suspeitu insiál LBB. Ho ida ne’e mak suspeitu satiadu hodi foti tudik ta’a lezada to’o kanek,” porta-vóz Arnaldo informa.

Insidente ida ne’e nu’udar mós kazu ida hosi totál insidente hamutuk 43 ne’ebé akontese hahú hosi 11 to’o 17 Novembru 2020.

Fonte: Mídia Polícia Nacional de Timor-Leste (PNTL)

Notísia Hotu-Hotu >