Komunidade Ermera Hato’o Preokupasaun Ba SEJD Relasiona Ho Joven Isin-Rua Sedu

Dili, 19 Novembru 2020 – Komunidade iha munisípiu Ermera hato’o sira-nia lamentasaun ba Sekretáriu Estadu Juventude no Desportu (SEJD) Abrão Saldanha, realsiona ho joven sira ne’ebé barak tebes mak isin-rua sedu liu.

Abrão Saldanha simu preokupasaun ida ne’e, wainhira hola parte mós iha diálogu ne’ebé Prezidente Repúblika Francisco Guterres Lú Olo halo ho komunidade no autoridade sira , iha kinta (19/11) ne’e, iha Glenu, Ermera.

Relasiona ho preokupasaun joven isin-rua sedu, Abrão Saldanha responde katak, SEJD halo hela servisu atu tulun joven sira hodi labele monu ba risku ida ne’e, no tulun sira ne’ebé monu tiha ona iha risku ne’e.

“Daudauk ne’e SEJD servisu hamutuk ho ekipa hosi Konferénsia Episkopál Timorense atu finaliza manuál edukasaun ida kona-ba Relasaun Saudável. Manuál ida ne’e sei tulun hodi akompaña no halo prevensaun atu joven sira labele monu ba risku ida ne’e. Tinan 2021 SEJD sei hahú programa kampaña ida ne’e, ne’ebé mak sei lidera hosi joven sira rasik hodi ko’alia ba sira-nia maluk joven sira”, Abrão esplika.

Fonte: Mídia Secretário Estado Juventude e Desporto (SEJD)

Notísia Hotu-Hotu >