Konis Santana Nia Soldadu Ho Kódigu Tatoli Agora Sofre Moras No La’o La Di’ak

Manufahi, 19 Novembru 2020 – Ekipa konjunta administrasaun munisípiu Manufahi, ohin (19/11), vizita hodi fó apoiu kadeira roda ba funu-na’in ka veteranu dezmobilizadu Alexandre Mendes ho kódigu ‘Tatoli’ ne’ebé sofre moras hodi la’o la di’ak, iha nia rezidénsia bairu Aidhaleu, suluk Letefoho, postu-administrativu Same.

Administradór munisípiu Manufahi Arantes Isaac Sarmento hateten, ekipa konjunta ne’e kompostu hosi sentru solidariedade sosiál ho servisu saúde munisipál, ne’ebé mak halo vizita hodi haree direita veteranu Tatoli nia kondisaun moras no la’o la di’ak.

Ekipa konjunta apoia kedas kadeira roda no lori mós médiku hodi halo tratamentu rutina ba veteranu Tatoli. Ekipa mós sei aprezenta ba sentru solidariedade sosiál nasionál atu lorin Tatoli ba halo terapia iha Dili.

Entretantu, veteranu Tatoli hanesan soldadu FALINTIL hahú hosi tinan 1975,  no nu’udar soldadu dahuluk Komandante Mauhunu ho Komandante Nino Konis Santana iha ai-laran.

Fonte: Diáriu "Roman ba Sosiedade" Manufahi

Notísia Hotu-Hotu >