FDCH Aloka Bolseiru Na'in-23 Ba MAP Hodi Hala'o Estájiu Profisionál Durante Fulan 6

Dili, 19 Novembru 2020 – Fundu Dezenvolvimentu Kapitál Umanu (sigla portugés FDCH) ofisialmente aloka bolseiru graduadu hamutuk na'in-23 ba Ministériu Agrikultura no Peska (MAP), hadi hala'o estájiu profisionál durante fulan neen (6). Bolseiru hirak ne’e termina ona sira-nia estudu iha área Peska no Estudu Marinu iha universidade sira iha Indonézia ho nível estudu Diploma IV no III.

Diretora Ezekutiva FDCH Leila Cárceres dos Santos, iha nia intervensaun iha kinta (19/11) ne'e, iha salaun MAP Komoro, hateten, estájiu profisionál ne'e nu'udar oportunidade ida ba bolseiru graduadu sira hodi manán esperiénsia servisu tuir área estudu bolseiru ida-idak nian, no bele tama mós ba iha merkadu traballu.

Diretór Jerál Interinu MAP Horacio Amaral Guterres ne'ebé simu estajiáriu hirak ne'e, agradese ba FDCH hodi koloka sira ba hala'o estájiu profisionál iha MAP, nune'e, MAP sei koloka estajiáriu hirak ne'e tuir área estudu ida-idak nian tuir diresaun sira ne'ebé MAP iha.

Estajiáriu na'in-23 ne’e hanesan benefisiáriu ba programa bolsa estudu ne’ebé organiza hosi liña ministeriál no hetan apoiu finanseiru hosi FDCH.

Fonte: Mídia Fundo De Desenvolvimento Do Capital Humano (FDCH)

Notísia Hotu-Hotu >