Dili, 19 Novembru 2020 - Vise Ministru Interiór (MI) António Armindo, akompaña hosi asesór legál Gabinete Primeiru-Ministru (GPM) nian, Andre Rodriges Fernandes, hasoru malu direitamente ho Komandante Jerál Polísia Nasionál Timor-Leste (PNTL) Komisáriu Faustino da Costa no Segundu Komandante Jerál PNTL Komisáriu Mateus Fernandes, ho objetivu hodi fó solusaun lalais liu no posível ba situasaun dívida naun-finanseira, iha kinta (19/11) ne'e, iha Kuartél Jerál PNTL, Kaikoli, Dili.

“Ohin ita mai hasoru malu ho Komisáriu na'in rua (2) hodi halo avaliasaun ba tusan iha PNTL nian hodi asegura ezekusaun ba OJE (Orsamentu Jeral Estadu) tinan fiskál 2020 tenke la'o ba oin, atu nune’e hahú planu ba 2021 ne’e bele foka ba dezenvolvementu infraestrutura instituisaun PNTL nian no la'os atu selu tusan”, dehan Ministru Interiór António Armindo, hafoin remata enkontru.

Nia haktuir tán, haree mós kontratu no tusan hosi telekomunikasaun, Telemor, selu kámara CCTV, no manutensaun ba kareta.

António Armindo mós husu ba Komisáriu atu fó orientasaun ba parte finansa hodi tau atensaun ba pagamentu dívida inklui halo estimativa ba reseita Orsamentu Estadu nian, atu nune'e dívida ne'ebé iha labele boot liu fali kapasidade ne’ebé atu selu iha futuru, tanba sei aumenta iha despeza.