Feminina Migrasaun Realiza Semináriu Kona-ba Dezenvolve no Melloria Papél Feminina Migrasaun

Dili, 19 Novembru 2020 – Feminina hosi Diresaun Jerál Servisu Migrasaun realiza semináriu kona-ba ‘Dezenvolve no Melloria Papél Feminina Servisu Migrasaun’, hodi komemora loron feminina Migrasaun nian ba dala-V, ne’ebé hala’o ohin (19/11), iha salaun Ministériu Interiór Vila-verde, Dili.

Superintendente Xefe Polísia Natercia Martins nu’udar Oradora iha semináriu ne’e haktuir, “ita ko’alia kona-ba organizasaun nia susesu presiza feto ho mane iha ekipa ida, tanba servisu ne’e servisu grupu la’os individu, ne’e mak dehan Jéneru, dezafiu ne’ebé mosu prontu atu hasoru nafatin, dezafiu hirak ne’e labele sai hanesan bareira, maibé hanesan oportunidade no ita presiza optimista nafatin”.

Nia hatutan tán, dala-barak oportunidade iha maibé feto sira mak lakohi uza oportunidade ne’e. Feto tenke hatudu ba públiku katak feto mós bele hala’o servisu hanesan ho mane. 

“Dala barak ema dehan feto labele, sé wainhira seidauk fó knaar ida ba feto no oportunidade ba nia ita labele hateten katak nia labele, ne’e sai hanesan problema ida”, dehan Natercia.

Molok ne’e, iha loron hanesan, feminina migrasaun mós realiza eventu desportiva dada tali hodi komemora Loron Feminina Migrasaun ne’ebé hetan mós partisipasaun hosi Vise Ministru Interiór Arntónio Armindo.

Fonte: Mídia Serviço Relações Públicas de Ministério do Interior

Notísia Hotu-Hotu >