Parlamentu Nasionál Aseita Atu Hahú Debate Proposta OJE 2021 Iha 30 Novembru 2020

Dili, 20 Novembru 2020 – Tuir rezultadu reuniaun líder bankada ho Prezidente Komisaun Permanente sira no lidera hosi Prezidente Parlamentu Nasionál (PPN) Aniceto Guterres Lopes, ne’ebé hala’o iha kuarta (18/11) ne’e, deside no aseita ona atu hahú debate proposta Orsamentu Jerál Estadu (OJE) 2021 iha Jeneralidade, hahú hosi 30 Novembru, iha parte loro-kraik to’o 2 Dezembru 2020.

Informasaun ne’e hato’o hosi Deputadu Lídia Norberta, liuhosi konferénsia imprensa ne’ebé hala’o ohin (20/11), iha Parlamentu Nasionál.

Hafoin remata tiha debate OJE 2021 iha Jeneralidade, sei kontinua debate iha parte Espesialidade ho karáter normál, no tuir planu katak sei remata iha 15 Dezembru 2020.

Deputada Lidia mós informa katak, líder bankada deside ona atu hala’o mós plenária iha 24 Novembru 2020 hodi haree hikas Lei Protesaun Sivíl ne’ebé foin lalais Prezidente Repúblika veta tiha.

Fonte: Mídia Parlamento Nacional (PN)

Notísia Hotu-Hotu >