Dili, 29 Novembru 2020 – Rezultadu hosi jogu faze finál torneiu Futsál Ministériu Asuntu Parlamentár no Komunikasaun Sosiál (MAPKOMS) 2020 entre klube haat (4) ne’ebé realiza iha domingu (29/11) ne’e, klube mane hosi Banku Nasionál Komérsiu Timor-Leste (sigla portugés, BNCTL) mak hadau vitória nu’udar primeiru lugár ho rezultadu golu 5-3, wainhira joga kontra klube mane hosi Sekretaria Estadu Kooperativa (SEKOOP).

Klasifikasaun primeiru lugár ba klube feto hadau hosi Banku Sentrál Timor-Leste (sigla portugés, BCTL) ho rezultadu golu 5-3, wainhira joga hasoru klube feto hosi Ajénsia Notisioza Tatoli.

Hafoin jogu remata, Ministru MAPKOMS Francisco Jerónimo, atribui kedas prémiu ba klube sira ne’ebé sai manán-na’in ba primeiru lugár no segundu lugár.

Torneiu Futsál ne´e realiza hahú hosi fulan Outubru no remata iha loron 29 fulan Novembru 2020, ho nia objetivu mak hodi komemora Loron Proklamasaun Independénsia Timor-Leste 28 Novembru ba dala-45 (1975-2020).