Dili, 27 Novembru 2020 – Ministru Obras Públika (MOP) Salvadór dos Reis Pires, husu emprezáriu sira atu prepara-an hodi kompete iha tenderizasaun ba projetu konstrusaun estrada no eletrisidade ne’ebé sei realiza iha tinan 2021.

MOP hato’o ida ne’e liuhosi nia intervensaun, wainhira partisipa iha serimónia abertura ba Asembléia Jerál Anuál Kámara Komérsiu Indústria Timor-Leste (sigla portugés, CCI-TL) tinan 2020 nian iha sexta (27/11) ne’e, salaun Katedrál, Dili.

“Ita iha millaun $120 hanesan ne’e, ita investe iha tinan oin, liuliu ita-boot sira hatene karik estrada munisipál ne’ebé daudauk ne’e ita halo hela dezeñu pur volta pakote 12, no mós ponte 10 hanesan ne’e, ne’e investimentu iha fundu infraestrutura. Sé ita tau ba tenderizasaun iha 2021, ha’u husu ba ita-boot sira atu prepara-an konkore ba projetu sira ne’e. Aléin hosi ne’e, projetu 114 iha fundu infraestrutura iha área estrada rasik. Ba eletrisidade mós ita tenta kontinua dada ba suku sira ne’ebé seidauk asesu ba eletrisidade. Ba oin husu nafatin ba ita-boot sira atu prepara-an di’ak liután, para bele kompete iha projetu sira ne’e”, dehan Salvadór Pires.

Salvadór esplika tán, MOP no Ministériu Planu no Ordenamentu (MPO) hamutuk ho CCI-TL sei halo sosializasaun hodi halo pra-kualifikasaun ba kompañia sira atu nune’e bele determina klasifikasaun ba setór privadu sira tuir kapasidade finanseiru no esperiénsia ne’ebé mak iha durante nia estabelesimentu, hodi kompete tuir ida-idak nia nível.