Julitu Miguel Ne’ebé Kria Aviaun Ki’ik Hakarak Sai Sientista No Pilotu

Dili, 30 Novembru 2020 – Julitu Miguel, estudante ida ne’ebé kria aviaun ki’ik no bele semo inklui kontrola ho remote control, hato’o mehi ba Sekretáriu Estadu Juventude no Desportu (SEJD) Abrão Saldanha katak nia hakarak sai sientista no pilotu ida.

Julito hato’o esperansa ne’e hodi responde ba pergunta kona-ba nia mehi pesoál, wainhira hasoru malu ho SEJD Abrão Saldanha, hafoin serimónia hasa’e bandeira hodi komemora Loron Proklamasaun Independénsia 28 Novembru ba dala-45 remata, iha munisípiu Vikeke.

Abrão Saldanha mós enkoraja Julito atu labele husik nia mehi maske hasoru dezafiu oioin, no sei buka dalan atu oinsá mak Julito bele hetan tulun hodi atinje nia mehi.

La’os aviaun de’it maibé Julito mós bele halo mákina oioin hanesan mákina dulas nuu, mákina behu batar, mákina ba dulas kafé, mákina ba ko’a kripik hosi fehuk europa, señora, talas, aifarina ka hudi.

Julito Miguel hela iha Naeboruk, munisípiu Vikeke, no fa’an és ho dosi loro-loron hodi sustenta ninia eskola tanba inan-aman laiha kbiit natón.

Fonte: Mídia Secretário Estado Juventude e Desporto (SEJD)

Notísia Hotu-Hotu >