Dili, 01 Dezembru 2020 – Ministru Koordenadór ba Asuntu Ekonómiku (MKAE) Joaquim Amaral, hamutuk ho Sekretáriu Estadu Formasaun Profisionál no Empregu (SEFOPE) Alarico de Rosário, halo despedida ho kandidatu traballadór Seasonal Worker Program (SWP) hamutuk na’in-162 ne’ebé mak atu desloka aban (02/12) hodi ba servisu iha Austrália.

Hafoin remata serimónia despedida ne’ebé hala’o ohin (01/12) iha Salaun Delta Nova, Dili, Alarico de Rosário ba jornalista sira hateten katak, hosi totál 162 ne’e feto hamutuk 59 no mane 103 ne'ebé selesionadu hosi munisípiu 12 no RAEOA. Ohin halo despedida no asina deklarasaun atu sira bele aranka ba Austrália aban.

Liuhosi intervensaun iha serimónia ne'e, SEFOPE husu ba kandidatu traballadór sira atu hatudu komportamentu di’ak hodi bele lori rezultadu di’ak mai aprezenta ba família no ba Governu.

“Servisu iha ne’ebá fila mai lori osan ba inan-aman iha Timór atu hán hanesan liurai [...] ita-nia maluk balu iha Austrália ne’ebé halai sai tiha hosi sistema tanba situasaun mak haruka, maibé ha’u husu ba imi labele halo hanesan ne’e tán. Lori Timór nia naran ba hatudu disiplina di’ak”, Alarico salienta tán.

MKAE Joaquim Amaral iha nia intervensaun, hato’o parabéns ba kandidatu traballadór hirak ne’e tanba sira mak hetan uluk oportunidade atu ba servisu iha Austrália iha tinan 2020 liuhosi prosesu selesaun ne’ebé naruk. Nia mós husu timoroan hirak ne’e atu servisu ho di’ak no ho profisionál iha ne’ebá.

Serimónia ne’e hetan mós partisipasaun hosi Embaixadór Austrália iha Timor-Leste no kandidatu traballadór sira-nia inan-aman ka enkaregadu.