Dili, 03 Dezembru 2020 – Sekretáriu Estadu Formasaun Profisionál no Empregu (SEFOPE) Alarico de Rosário hateten katak joven sira nee’bé atu ba servisu iha Austrália ne’e la halo juramentu ba Partidu Kmanek Haburas Unidade Nasionál Timoroan (KHUNTO) tanba SEFOPE nunka diskrimina joven timoroan sira.

Alarico informa ida ne’e ohin (03/12) iha nia knaar fatin Kaikoli, Dili, hodi responde ba Deputada Veneranda Lemos ne’ebé kestiona wainhira nia halo intervensaun iha kuarta (02/12) ne’e iha Parlamentu Nasionál.

“Joven ne’ebé atu ba iha Austrália halo juramentu ba Partidu KHUNTO ne’e la loos, tanba SEFOPE nunka halo diskriminasaun ba joven timoroan hotu. Ida ne’ebé mak tuir teste pasa ona no naran tama iha sistema, nia iha direitu tomak atu bele ba servisu iha Austrália”, deklara Alarico.

Nia esplika tán, Governu Timor-Leste liuhosi SEFOPE fasilita de’it hodi halo komunikasaun ba ajénsia hosi Austrália. Naran ne’ebé tama ona iha sistema sei haruka ba Austrália no ajénsia sira hosi ne’ebá mak hili no fó kontratu mai.