Dili, 03 Dezembru 2020: Primeiru-Ministru (PM) Taur Matan Ruak halo klarifikasaun katak kazu joven sira asalta nia Espoza Isabel Ferreira nia kareta ne’ebé akontese iha kuarta (02/12) madrugada ne’e tanba joven sira ho kondisaun lanu no sira la’os hosi PM nia área hela-fatin.

Taur klarifika ida ne’e iha kinta (03/12) ne’e iha Parlamentu Nasionál, tanba Deputadu Cornelio Gama ‘L7’ lamenta ho aktu asaltu refere, wainhira sira debate kona-ba pedidu renovasaun estadu emerjénsia.

“Ha’u hanoin kazu ne’e tanba alin sira ne’ebé aborda, baku kareta, ne’e tanba lanu la’os baibain, no joven sira hosi fatin seluk ba iha ne’ebá lanu, la’os bairu ami nian”, dehan Taur.

Taur mós haktuir katak nia Espoza atu ba partisipa iha misa, no hetan asaltu hosi joven sira ho kondisaun lanu. Tanba ne’e, kondutór alarma nune’e seguransa sira alarma mós ba polísia.

“Maibé ha’u husu deskulpa barak, espera katak kazu ida ne’e labele perturba, ita hotu hanoin katak ne’e buat ruma ne’ebé organizadu ne’e la loos, ne’e simplesmente tanba joven ne’e lanu no polísia tau-matan hela ba ida ne’e”, Taur konklui.