Dili, 04 Dezembru 2020 – Prezidente Repúblika Francisco Guterres Lú Olo, liuhosi mensajen divulgadu, dekreta Estadu Emerjénsia (EE) daualuk ba loron 30 tán ne’ebé abranje teritóriu Timor-Leste, hahú hosi ohin (04/12) tuku 00:00 no sei termina iha 23:59 iha 02 Janeiru 2021.

EE ida ne’e sei parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualkér pontu iha teritóriu nasionál no direitu ba rezidénsia.

Autoridade públika kompetente sei impoin restrisaun nesesária ba redusaun risku hada’et nian, no ezekuta medida prevensaun no kombate epidemia ida ne’e.

Prezidente Repúblika dekreta EE daualuk ne’e, hafoin iha kinta (03/12) ne’e Parlamentu Nasionál fó autorizasaun ba renovasaun EE, ho votu á favór 46, kontra 0 no abstensaun 3.