Dili, 04 Dezembru 2020 – Komandu Polísia Nasionál Timor-Leste (PNTL) munisípiu Dili Euclides Belo husu ba sidadaun hotu-hotu iha munisípiu Dili atu harii prezépiu dook metru lima (5) hosi estrada, no labele konsume bebida alkólika no toka múzika la’os natál nian iha prezépiu.

Euclides Belo hato’o ida ne’e ohin (04/12) iha nia knaar fatin Kaikoli, Dili, relasiona ho fulan Dezembru ne’ebé halo sidadaun sira harii prezépiu hodi hein selebrasaun loron natál nian.

“Komandu PNTL munisípiu Dili iha hela konkordánsia ho parte Igreja [...] prezépiu halo tenke dook metru lima (5) hosi estrada [...] prezépiu la’os fatin atu konsume bebida alkólika no toka múzika sira ne’ebé mak la’os natál nian. Volume toka múzika nian mós tenke kontrola para depois labele implika ba ema seluk”.

Euclides mos hateten katak PNTL bandu sidadaun sira atu importa no fa’an fugeti ilegál.

“Espera katak sarani katólika iha Dili ne’e sei kumpri regra ne’e. Sira ne’ebé la kumpri, ami sei foti medida”, Euclides konklui.