Dili, 04 Dezembru 2020 – Espoza Prezidente Repúblika Cidalia Nobre Guterres apela ba Estadu atu fó atensaun liu ba formasaun hodi hasa’e manorin sira-nia koñesimentu no fó atensaun mós ba infraestrutura nesesáriu atu kualifika edukasaun.

Cidalia Guterres hato’o apelu ne’e ohin (04/12), wainhira partisipa iha serimónia inaugurasaun edifísiu foun ensinu pre-eskolár Santa Teresinha do Menino Jesus, iha Bedois, Dili, hodi asina mós plaka.

Espoza Prezidente Repúblika enfatiza katak Estadu tenke kualifika edukasaun ne’ebé ekitativu no inkluzivu hodi promove oportunidade ba aprendizajen durante moris tomak ba ema hotu-hotu.

Nia husu mós ba manorin sira atu implementa programa zero toleránsia ba violénsia iha eskola.

Ikus, Espoza Prezidente Repúblika kongratula no agradese ba inisiativa Diretór Eskola Padre Alberty Franco Morato, manorin no estudante sira-nia família ba esforsu tomak hodi kria edifísiu pre-eskolár foun ne’e.