Dili, 04 Dezembru 2020 - Maske ema balu haree katak apoiu sesta bázika ne'e la sufisiente ka ema balu sente la satisfáz ho ai-hán ne'ebé Governu oferese, Xefe suku Bebonuk Serafim Macedo husu atu komunidade sira presiza agradese tanba Governu bele realiza programa ida ne'e iha momentu ne'ebé Timor-Leste enfrenta mós pandemia Covid-19.

Xefe suku Bebonuk hato'o ida ne'e ohin (04/12) iha supermerkadu W-Four, iha Bebonuk, wainhira nia halo observasaun ba komunidade hosi aldeia Metin III ne'ebé ba simu ai-hán sesta bázika uza voucher iha supermerkadu refere.

“Ba komunidade sira, hanesan ita sente buat ne’ebé mak fornese hosi Governu dalaruma ita balu haree katak sufisiente no balu haree la sufisiente [...] maske ita sente buat ne'e la satisfáz ka la di'ak maibé saida mak Governu halo ne'e katak buat hotu ne'e tuir ida ne'ebé mak Governu halo estudu ne'ebé loloos [...] Ita mós tenke agradese katak Governu iha situasaun ida ne'e maske ita hasoru hela Covid-19 bele fó apoiu", Serafim hateten.

Xefe suku ne'e haktuir tán, apoiu refere Governu fó atu bele sustenta netik komunidade ba fulan ida ka rua nia laran.

Molok komunidade sira ba simu, iha loron ne'ebé hanesan,  Governu halo uluk lansamentu ba apoiu sesta bázika ho modelu voucher, iha CCD, Dili.