Povu Fatuberliu La Satisfáz Tanba Governu Fahe Fali Batar Ho Fore Ne’ebé Sira Hán Hela Loro-Loron

Dili, 17 Dezembru 2020 – Benefisiáriu Sesta Bázika ho inisiál JBS hateten katak nia la satisfáz ho sasán ne’ebé sira simu hanesan batar-ikis no batar-uut tanba sira loro-loron hán hela, maibé Governu mai fó tán batar-ikis no batar-uut. Tanba ne’e, nia prefere Governu atu troka fali ho sasán seluk, tuir informasaun ne’ebé Provedoria ba Direitu Umanu no Justisa (sigla portugés PDHJ) divulga ohin (17/12).

Inisiál JBS hato’o nia lamentasaun ida ne’e ba ekipa PDHJ ne’ebé halo monitorizasaun ba prosesu distribuisaun Sesta Bázika iha suku Klakuk, postu-administrativu Fatuberliu, munisípiu Manufahi.

JBS haktuir tán, nia iha dúvida ho Governu nia programa Sesta Bázika ne’e.

“Povu loro-loron hán hela batar ho fore maibé (Governu) fó nafatin batar ho fore. Prefere atu troka fali ba sasán sira ne’ebé durante ne’e (ami) laiha kbiit atu sosa,” nia akresenta.

Nia dehan tán, ba simu sasán Sesta Bázika ne’e mós sei selu fali tán transporte hodi tula sasán, no prosesu distribuisaun la organizadu tanba dudu malu hodi kontra tán regra distánsia sosiál ne’ebé hamosu risku tebes atu disemina moras Covid-19.

Fonte: Mídia Provedoria dos Direitos Humanos e Justiça (PDHJ)

Notísia Hotu-Hotu >