Dili, 17 Dezembru 2020: Xefe Governu Taur Matan Ruak diskute ho Sekretáriu Estadu Protesaun Sivíl (SEPS) Joaquim Gusmão, ohin (17/12), iha palásiu Governu, relasiona ho SEPS nia preparasaun hodi hasoru risku hosi fenomena La-Nina ne’ebé karik mosu hodi rezulta dezastre balu.

“Primeiru-Ministru mak bolu ha’u mai atu bele fó orientasaun balu liuliu primeiru kona-ba preparasaun SEPS nian hodi hasoru fenomena La-nina. Tanba ne’e, S.E. Primeiru-Ministru hato’o nia preokupasaun karik ne’e akontese ita bele responde lalais ba situasaun ne’e ho di’ak”, dehan SEPS Joaquim Gusmão.

SEPS mós alerta ona ba populasaun iha fulan Outubru liubá katak Timor-Leste bele sai alvu hosi fenomena La-Nina ne’ebé sei hamosu udan  no anin maka’as, no seluk tán ne’ebé bele kauza dezastre balu.

Google News haktuir, fenomena ne’e posivelmente sei akontese iha semana ikus tinan 2020 nian no semana dahuluk tinan 2021 nian.